Evrópulaufið
Evrópulaufið er samnefnari fyrir vottaða lífræna framleiðslu í löndum Evrópusambandsins og Evrópska efnahagssvæðisins. Það má nota á allar vottaðar matvörur og fóður sem upprunnar eru úr landbúnaði. Merkið er staðfesting þess að umræddur framleiðandi vinni samkvæmt gildandi lögum um lífræna framleiðslu og er heimild til notkunar merkisins háð því að starfsemi framleiðanda sé undir reglubundnu eftirliti. Nýlega tók gildi hér á landi reglugerð ESB sem gerir framleiðendum skylt að nota merkið á vottaða íslenska framleiðslu.
Vottunarmerki Túns
Vottunarmerki Túns hefur verið notað fram að þessu á vottaða lífrænar landbúnaðarafurðir og vinnsluvörur, sem og snyrtivörur. Merkið staðfestir að umræddur framleiðandi vinnur samkvæmt gildandi lögum um lífræna framleiðslu og er heimild til notkunar merkisins einnig háð því að framleiðslan sé undir reglubundnu eftirliti. Vottunarmerki Túns nær einnig til lífrænnar framleiðslu sem ekki fellur undir gildissvið reglugerða, t.d. snyrtivara og matreiðslu. Þá er sambærilegt vottunarmerki notað fyrir vottun ýmissa aðfanga sem heimilt er að nota í lífrænni framleiðslu, t.d. framleiðslu á salti, kalkþörungum, fiskimjöli og lýsi úr sjávarfangi.
Lög og reglur um lífræna framleiðslu
Ákvæði eru um lífræna framleiðslu í lögum nr. 93/1995 um matvæli og í lögum nr. 22/1994 um eftirlit með fóðri, áburði og sáðvöru. Þau komu í stað laga um lífræna landbúnaðarframleiðslu nr. 162/1994 sem voru felld niður í júní 2022.
Ítarlegar kröfur í lífrænni ræktun og framleiðslu eru settar í reglugerðum og eru þær helstu þessar:
- Reglugerð nr. 205/2003 um lífræna framleiðslu og merkingu lífrænt ræktaðra vara. Hún innleiðir reglugerð ESB nr. 2018/848 sem tók gildi í Evrópu 1. Janúar 2022 og síðari breytingar á henni.
- Reglugerð nr. 204/2023 um skrána yfir þriðju lönd og skrána yfir eftirlitsyfirvöld og eftirlitsaðila sem hafa verið viðurkennd hvað varðar innflutning á lífrænt ræktuðum vörum inn í ESB. Hún innleiðir reglugerð ESB nr. 2021/2325 um að fastsetja samkvæmt reglugerð Evrópuþingsins og ráðsins (ESB) 2018/848, skrána yfir þriðju lönd og skrána yfir eftirlitsyfirvöld og eftirlitsaðila sem hafa verið viðurkennd að því er varðar innflutning á lífrænt ræktuðum vörum inn í Sambandið.
- Reglugerð nr. 203/2023 um gildistöku reglugerðar (ESB) 2021/1165 um að leyfa tilteknar vörur og efni til notkunar við lífræna framleiðslu og koma á fót skrám yfir þau. Hún innleiðir reglugerð ESB nr. 2021/1165 sem inniheldur lista í viðaukum yfir leyfð efni, varnarefni, áburðarefni, fóðurhráefni og aukefni í fóður, og aukefni í matvælavinnslu.
Þessar evrópugerðir hafa verið uppfærðar með ýmsum viðbótum og því eru allir hvattir til að opna evrópuútgáfuna á Eur-Lex og finna þar uppfærða (consolidated) útgáfu af reglugerðunum. Þar er einnig hægt að finna reglugerðirnar á öllum tungumálum ESB.
Upplýsingar teknar af vefsíðu MAST.
Nánar má lesa um lög og reglugerðir inni á vefsíðu MAST og TÚN
